• 64 % mengen, datt d’russesch Invasioun an d’Ukrain an hir Follegen en Ustouss gi sollten, d’Energiewend ze beschleunegen
• Trotz der Energie- an Inflatiounskris betruechte méi ewéi d’Halschent vun de Leit zu Lëtzebuerg (55 %) de Klimawandel als déi gréisst Erausfuerderung, virun där d’Land steet (+2 Punkte géintiwwer dem Virjoer).
• 84 % mengen, datt wa mir eisen Energie- a Wuereverbrauch an de kommende Joren net drastesch reduzéieren, mir op eng global Katastroph zousteieren.
• 59 % ginn der Besteierung vu staark verschmotzende Wueren a Servicer wéi SUVen a Loftverkéier Prioritéit
• 57 % ënnerstëtzen eng Indexéierung vun den Energiepräisser op den Niveau vum Verbrauch jee Stot: Wat méi verbraucht gëtt, wat d’Energie méi deier gëtt 

Dëst sinn e puer vun de Resultater vun der leschter järlecher Klimaëmfro, déi am August 2022 duerchgeféiert an haut vun der Europäescher Investitiounsbank (EIB) verëffentlecht gouf. D’EIB ass d’Finanzéierungsinstitutioun vun der Europäescher Unioun an de weltwäit gréisste multilaterale Kreditgeeber fir Klimaschutzprojeten.

No engem erausfuerdernde Joer, an deem déi Russesch Invasioun an d’Ukrain eng unhalend Energiekris an eng beschleunegt Inflatioun a ganz Europa ausgeléist, an an engem Summer mat extreemem Wieder, dee vu Rekordhëtztwellen an Dréchente gekennzeechent war, si sech d’Lëtzebuerger den Auswierkunge vum Klimawandel an der Drénglechkeet zum Handelen nach méi staark bewosst ginn.

Bewosstsinn an Drénglechkeet vum Klimawandel

Wärend Covid-19 am vergaangene Joer  als déi gréisst Erausfuerderung fir d’Leit zu Lëtzebuerg ugesi gouf, dominéieren haut d’Suergen iwwer de Klimawandel, woubäi 55 % en als hir gréisst Suerg zitéieren – am Verglach zu 41 % am Rescht vun der EU 

An Tëschenzäit soen 82 % vun de Leit zu Lëtzebuerg, datt si d’Auswierkunge vum Klimawandel op hiert deeglecht Liewe spieren (+5 Punkte géintiwwer 2021).

Fir d’Energie- a Klimakris ze léisen, menge 84 %, datt wa mir eisen Energie- a Wuereverbrauch an de kommende Joren net drastesch reduzéieren, mir op eng global Katastroph zousteieren. Gläichzäiteg si weider 84 % der Usiicht, datt d’Regierung zu lues handelt, an nëmmen 31 % mengen, datt et Lëtzebuerg geléngt, seng CO₂-Emissioune bis 2030 däitlech ze reduzéieren.

Krich an der Ukrain an Energiewend

Déi meescht Leit zu Lëtzebuerg (64 %) mengen, datt de Krich an der Ukrain a seng Follege fir de Pëtrol- a Gaspräis en Ustouss sollte ginn, d’Energiewend ze beschleunegen (am Verglach zu 66 % fir den europäeschen Duerchschnëtt).

Nom Ranking vun de Prioritéite vun den Aktioune gefrot, erwaarden d’Leit zu Lëtzebuerg, datt hir Regierung den Ausbau vun erneierbaren Energien (41 %) prioriséiert, knapp gefollegt vun der Konzentratioun op d’Diversifizéierung vun der Energieversuergung, fir eng iwwerméisseg Ofhängegkeet vun engem eenzegen Ubidder (35 %) ze vermeiden.

D’Energieaspuerung rangéiert och héich an de Prioritéiten. E Véierel vun de Leit zu Lëtzebuerg mengt, datt d’Bierger an Entreprisë méi ënnerhuele mussen, fir hiren eegene Verbrauch ze reduzéieren – méi ewéi anzwousch anescht an Europa (24 % géintiwwer 19 %). Dëst ass besonnesch bei eelere Generatiounen de Fall (32 % bei 65-Järegen an driwwer).

Bekämpfung vum Klimawandel a vu den héijen Energiepräisser

Fir den Energieverbrauch ze reduzéieren, prioriséieren d’Leit zu Lëtzebuerg d’besonnesch staark besteierung vun staark verschmotzende Wueren a Servicer wéi SUVen a Loftverkéier (59 %). Si ënnerstëtzen och d’Indexéierung vun Energiepräisser op den Niveau vum Verbrauch jee Stot (57 %): Wat méi verbraucht gëtt, wat d’Energie méi deier gëtt.

Wann d’Leit zu Lëtzebuerg dëse Wanter d’Temperatur an hiren Heemer reduzéiere missten, géifen 29 % akzeptéieren, se op 19 °C ze reduzéieren, wat déi offiziell Empfielung ass (woubäi 47 % vun de Fransousen a 27 % vun den Däitschen dat akzeptéiere géifen). An Tëschenzäit soen 12 % vun de Lëtzebuerger, datt si et sech schonn net méi leeschte kënnen, hiert Heem uerdnungsgeméiss ze hëtzen.

Zu gudder Lescht mengen d’Leit zu Lëtzebuerg bei der Bekämpfung vun den héijen Energiepräisser, datt d’Regierung kuerzfristeg d’Energiesteiere reduzéieren (32 %) an d’Präisser fir Gas, Pëtrol a Kuel (30 %) deckelen a reguléiere sollt.

De Kris Peeters, Vizepresident vun der EIB, huet erkläert: „Am Virfeld vun der COP27-Klimakonferenz hunn d’Resultater vun der EIB-Klimaëmfro 2022 gewisen, datt d’Leit zu Lëtzebuerg der Meenung sinn, datt d’Beschleunegung vu Moossname fir d’Fërderung vun erneierbaren Energien an Energieeffizienz d’Prioritéit bei der Bekämpfung vun der globaler Energie- a Klimakris sollt sinn. Bei der EIB ënnerstëtze mir zanter ville Joren innovativ Investitiounen a propper Energie, wéi Wandparken a méi energieeffiziente soziale Wunnengsbau. Mir si bereet, eise gesamte Spektrum u Berodungs- a Finanzinstrumenter ze notzen, fir Lëtzebuerg bei enger gerechter Energiewend ze ënnerstëtzen, déi keen zeréckléisst.“

Iwwer d’EIB-Klimaëmfro

D’Europäesch Investitiounsbank huet déi fënneft Editioun vun der EIB-Klimaëmfro gestart, déi eng grëndlech Bewäertung vun der Astellung vun de Mënschen zum Klimawandel duerstellt. Déi fënneft Editioun vun der EIB-Klimaëmfro, déi an Zesummenaarbecht mat der Maartfuerschungsentreprise BVA duerchgeféiert gëtt, soll déi méi breet Debatt iwwer Astellungen an Erwaardungen am Hibléck op de Klimaschutz ureegen. Am August 2022 hu méi ewéi 28/ 000 Befroter un der Ëmfro deelgeholl, mat engem representative Panel vu Leit ab 15 Joer a fir jiddwereent vun den 30 befrote Länner.

Iwwer d’Europäesch Investitiounsbank (EIB)

D’EIB, där hir Undeelseegner déi 27 Memberstate vun der Europäescher Unioun sinn, ass d’Institutioun vun der Europäescher Unioun fir laangfristeg Finanzéierungen. Se finanzéiert héichwäerteg Investitiounen, déi zu den Ziler vun der Europäescher Unioun bäidroen. Zanter 2019 huet se hir Transformatioun an eng Klimabank beschleunegt, andeem se sech verflicht huet, op d’mannst 50 % vun hirer Finanzéierung ab 2025 fir Investitiounen ze investéieren, déi zum Kampf géint de Klimawandel an zur Verréngerung vu sengen Auswierkunge bäidroen.

Iwwer BVA

BVA ass eng Meenungsfuerschungs- a Berodungsentreprise, déi als eng vun den innovativste Maartfuerschungsentreprisen a hirer Branche unerkannt ass. BVA ass op Verhalensmarketing spezialiséiert a kombinéiert Daten- a Sozialwëssenschaft, fir Daten inspiréierend ze gestalten an d’Liewen ze ruffen. BVA ass och Member vum Worldwide Independent Network (WIN) fir Maartfuerschung, engem globalen Netzwierk vu e puer vun de féierende Maartfuerschungs- an Ëmfroentreprisë mat iwwer 40 Memberen.